Nakatakda nang ilabas anumang oras mula ngayon ang isang kalatas na sumusuporta sa posisyon ng 13 mahistrado ng Korte Suprema.
Ito’y kasunod ng puwersahang pagpapa-bakasyon ng mga naturang mahistrado kay Chief Justice MARIA lourdes Sereno sa isinagawang En Banc Session ng mga ito nuong nakalipas na linggo.
Ayon sa source ng DWIZ, naghihintay na lamang ang isang grupo ng mga hukom ng hudyat para ilabas na ang kanilang saloobin hinggil sa nangyaring gulo sa loob ng Korte Suprema.
Magugunitang kinontra ng mga mahistrado ang inilabas na pahayag sa publiko ng mga abogado ni Sereno na naka-wellness leave lamang ang punong mahistrado na anila’y isang malaking paglalagay sa buong hanay ng hudikatura sa balag ng alanganin.
Jaymark Dagala / Bert Mozo / RPE
