Nagpatupad ng balasahan ang PNP o Philippine National Police sa 12 Heneral na may hawak ng iba’t ibang matataas na posisyon.
Isang linggo bago ang anibersaryo ng Mamasapano Incident, ibinalik sa PNP – Special Action Force si Police Director Noli Taliño bilang bagong hepe ng nasabing unit.
Matatandaang si Taliño ang nagsilbing Officer In Charge ng SAF noong pumutok ang madugong Mamasapano Operation habang iniimbestigahan ang dating hepe ng unit na si retired General Getulio Napeñas.
Kasama rin sa balasahan ang direktor ng PNP Region 7 na si Chief Superintendent Jose Mario Espino na inilipat sa PNP Region 10.
Ang dating direktor naman ng PNP Cordillera na si Chief Superintendent Elmo Francis Sarona ay direktor na ngayon ng DIDM o Directorate for Investigation and Detective Management.
Habang ang direktor ng PNP MIMAROPA na si Chief Superintendent Wilben Mayor ay inilipat naman sa Directorate for Operations.
