Tinitignan ni Pasig City Mayor Vico Sotto na gawing coronavirus disease 2019 (COVID-19) vaccination center ang mga pampublikong paaralan sa lungsod ng Pasig.
Sa ginanap na CODE Team visit sa lungsod ng Pasig, sinabi ni Sotto na ang mga pampublikong paaralan ay magandang lugar para isagawa ang pagpapabakuna.
May bentilasyon, masusunod ang physical distancing, at ang iba pang health protocols kapag isinagawa sa mga pampublikong paaralan ang pagpapabakuna ani Sotto.
Ipagpapaalam naman aniya ng alkalde ang paggamit ng mga pampublikong paaralan bilang vaccination centers sa Department of Education (DepEd).
Samantala, sinabi ng lokal na pamahalaan na hindi naman sapilitan ang pagpapabakuna ngunit hinihikayat ang mga residente na kung may pagkakataon ay magpabakuna na.
Tiniyak rin ni Sotto na ang mga maaaprubahang bakuna ay ligtas at mabisa basta’t aprubado ng FDA.
