Pinagiingat ng Philippine Embassy sa Libya ang mga Pilipino dahil sa kaguluhan sa naturang bansa.
Sinabi ng embahada na limang sibilyan ang nasawi habang labing dalawa ang nasugatan matapos tamaan ng rocket ang isang park sa bahagi ng Gorji road.
Napaulat din ang artillery strikes sa bahagi ng Qasr Bin Gashir at ilang lugar malapit sa Tripoli International Airport.
Dahil dito inabisuhan ng embahada ang mga Pilipino sa Qasr Bin Gashir at Esbea lalo na sa Al Afia Clinic, Ali Omar Askar Hospital at Al Nahr Company na pansamantalang lumikas sa lalong madaling panahon.
Nanawagan din ang embahada sa Filipino community sa Tripoli na maging maingat para matiyak ang kaligtasan at tumawag sa +218 94 454 1283 at +218 91 824 4208 sakaling mangailangan ng tulong.
