Pinayuhan ng Department of Foreign Affairs (DFA) ang mga Pinoy na ayaw paring lisanin ang bansang Ukraine sa kabila ng ginagawang pananakop ng Russia.
Nabatid na wala pang balak ang karamihan sa Overseas Filipino Workers (OFWs) sa nasabing lugar ang nais na umalis o umuwi dahil narin sa hirap ng buhay sa Pilipinas.
Ayon kay DFA Undersecretary Sarah Arriola, nagpunta na sa border ng Poland ang kanilang ahensya sa pangunguna ni Foreign Affairs Secretary Teodoro Locsin Jr. para personal na makita ang ginagawang pagtulong sa mga pinoy na umaalis ng Ukraine.
Aminado si Locsin na karamihan sa mga Pinoy ay ayaw magparepatriate at mas piniling magpunta sa Lviv upang magtrabaho.
Kabilang sa mga Filipino na nasa Ukraine ay nagtatrabahong bilang Household Service Workers, mga guro, mga kawani sa International Organizations, at mayroon ding nakapag-asawa na ng Ukraine Citizens.
Sinabi naman ni Locsin na handa ang kanilang ahensya na magbigay ng kanilang assistance sa mga Pilipinong nais umuwi ng Pilipinas bunsod ng tensyon sa pagitan ng Russia at Ukraine. —sa panulat ni Angelica Doctolero