Itinuturing na malaking hamon ng mga Senador kung saan kukunin ang pondo para sa pagpapatupad ng nilagdaang free college tuition act ni Pangulong Rodrigo Duterte.
Ayon kay Senate President Pro-Tempore Ralph Recto, kumpiyansa siyang may makukuhanan ng pondo para sa nasabing batas dahil sa paniniwalang budget delayed is education denied.
Para naman kay Senador Sonny Angara, maaari namang ilaan ang mga bagong ipapataw na buwis para sa pagpapatupad ng nasabing batas.
Pangako naman ni Senador Panfilo Lacson, kaniyang sisilipin sa panukalang pambansang pondo para sa susunod na taon ang mga pork barrel fund upang magamit sa pagbibigay ng libreng matrikula.
Savings naman ng mga ahensya ng gubyerno ang nakikita ni Senador JV Ejercito na posibleng mapaghugutan ng nasabing pondo.
