Hindi pa rin natinag ang mga pasaway na motoristang walang habas na nagbababa ng pasahero sa harap ng La Salle Greenhills sa Ortigas Avenue, San Juan City.
Ito’y makaraang balikan ng mga tauhan ng MMDA o Metro Manila Development Authority ang nasabing lugar upang kastiguhin ang mga lumalabag sa No Loading and Unloding Zone.
Ngunit sa halip na matakot, tumambad pa sa mga tauhan ng MMDA ang tila mala-parking lot na eksena sa harap ng eskuwelahan dahil dalawang lane na ang sinakop ng mga sasakyang nagbababa ng kanilang mga pasaherong mag-aaral.
Ayon naman kay Celine Pialago, tagapagsalita ng MMDA, nauunawaan naman nila ang sitwasyon ng mga motoristang hindi makapasok sa loob ng La Salle campus.
Gayunman, papayagan ng MMDA na gamitin ang emergency bay para pagbabaan ng mga mag-aaral ngunit hindi dapat magtagal ang mga ito.
By Jaymark Dagala
