Natagpuan ng mga otoridad ang umaalingasaw at nabubulok nang bangkay ng isang ginang at ng anak nitong babae sa Barangay Mercado, Hagonoy, Bulacan.
Ayon sa pulisya, nakilala ang mga biktima na sina Carmelita Tungol 69 taong gulang, at Grace Tungol 43 anyos, na sinasabing nasa 4 hanggang 5 araw nang patay.
Pahayag naman ng mga opisyal ng barangay, na ilan sa mga residente at kaanak ng mga biktima ang dumulog sa kanilang tanggapan dahil sa masangsang na amoy na kanilang nalalanghap mula sa bahay ng mag-inang tungol.
Agad na naghinala ang mga kamag-anak ng dalawa dahil sa hindi na sinasagot ng mga biktima ang kanilang text o tawag.
Blangko naman ang pulisya sa kung ano ang tunay na dahilan ng pagkamatay ng mag-ina dahil sa wala umanong nasira o nawawala sa bahay ng mga ito.
Sinabi naman ni Barangay Captain Rolando Santos, na ilang araw nang umuulan sa kanilang lugar kaya’t posible ring itinaon dito ng mga suspek ang pagpasok sa bahay ng mga biktima.
