Aminado si Soy Gonzales, ang concerned citizen na kumuha at nag-upload ng viral video ng pananakit at paninigaw ng isang lalaki sa isang nursing student habang nakasakay sa UV express na natakot din siya sa pagkuha ng naturang video.
Sinabi ni Gonzales na agad siyang kinutuban na baka may hindi magandang gawin ang lalaki na sa tingin niya ay lango sa droga, pagbukas pa lang nito ng pinto kaya nung mag-eskandalo ito ay agad niyang kinuhanan ng video.
Aniya pagpasok pa lang nito sa sasakyan ay galit agad nitong sinabi sa estudyante na “Aba hindi talaga umusog, talagang gusto pang pahirapan ang mga pasahero.”
Idinagdag ni Gonzales na hindi umurong ang estudyante dahil malapit na itong bumaba, na sa tingin niya ay tama lang naman.
Hindi na aniya tumigil ang lalaki sa paninigaw sa batang estudyante na pinangalanang ‘Joan’ at sinaktan pa ito na hindi na nahagip sa video.
Giit ni Gonzales, malaking tulong ang video na kinunan niya para magamit na ebidensya laban sa lalaki.
Binigyang diin nito na nakahanda siyang tumulong sa awtoridad sakaling kailanganin ng mga ito na kunin ang kanyang panig sa kaso.
Bahagi ng pahayag ni Ms. Soy Gonzales
By Katrina Valle | Ratsada Balita
