Kalaboso ang isang lalaking nagpakilalang miyembro ng National Bureau of Investigation (NBI) matapos mahulihan ng baril at mga bala sa General Mariano Alvarez (GMA), Cavite.
Kinilala ang suspek na si John Gandionco, 33 anyos, residente ng Dasmariñas City.
Ayon sa GMA Police, nagpapatrol sa COMELEC checkpoint ang kanilang mga tauhan nang parahin ang gray na Toyota Innova ng suspek.
Dito narekober ang isang super caliber 38 na kargado ng anim na bala at isang reserbang magazine na may limang bala kaya’t kinuwestyon ng mga pulis.
Nagpakilala si Gandionco bilang non-organic member ng NBI at nagpakita rin ng dalawang ID pero nagduda ang mga otoridad at inimbitahan siya sa presinto at bineripika kung konektado sa naturang ahensya. —sa panulat ni Mara Valle
