Patuloy pa rin ang paghahanap ng rescue teams sa posibleng bahagi ng Cessna plane na namataan ng mga residente malapit sa Barangay Sapinit sa Divilacan, Isabela.
Ayon sa Isabela Provincial Disaster Risk Reduction and Management Office (PDRRMO), nakita ang puting bagay sa masukal na bahagi ng gubat sa Barangay Sapinit.
Tila nakabitin ito sa mga puno na pawang kulay berde kaya madali itong naaninag ng mga residente.
Bigo namang makita ng rescue teams ang bahagi ng eroplano dahil natakpan na ng ulap ang lugar.
Noon pang nakaraang linggo nawala ang Cessna plane kung saan lulan nito ang anim katao kabilang ang piloto.
Pansamantala ring sinuspinde ang paghahanap nitong Biyernes dahil sa masamang lagay ng panahon.
