Hindi muna babayaran ng Philippine Health Insurance Corporation (PhilHealth) ang halos P1-B utang nito sa Philippine Red Cross (PRC).
Ayon kay PhilHealth President Dante Gierran, ito’y dahil sa ilang kuwesyunableng probisyong nakasaad sa nilagdaang memorandum of agreement (MOA) sa pagitan ng PhilHealth at PRC na kailangang malinawan.
Ang tinutukoy ni Gierran ang nilagdaang MOA sa ilalim ni dating PhilHealth President Ricardo Morales at ng PRC noong Mayo kung saan, dapat may revolving fund ang PRC na P100-M para sa COVID-19 test.
Malinaw na nakasaad sa MOA na kailangang punuan agad ito ng PhilHealth kapag naubos na ang revolving fund bagay na hindi natupad ayon kay Gierran.
Una nang ibinunyag ni dating PhilHealth Anti-Fraud Legal Officer Atty. Thorson Montes Keith na kuwesyunable ang nilagdaang kasunduan sa pagitan ng PhilHealth at PRC.
Sa panig naman ng PRC, umaasa silang maisasaayos agad ang gusot bagama’t nanindigan silang ligal naman ang nilagdaan nilang kasunduan kaya’t umaasa silang hindi ito hahantong sa demandahan.
