Haharapin ni Pinay Olympic Boxer Nesthy Petecio sa finals ang kanyang dating karibal na si Sena Irie ng Japan sa finals ng women’s featherweight division ng 2020 Tokyo Olympics.
Magbabakbakan sina Petecio at Irie para sa olympic gold sa Kokugikan Arena, Tokyo, sa Martes.
Marso noong isang taon nang magharap sa quarterfinals ng Asia and Oceania Boxing Olympic Qualification Tournament sa Amman, Jordan ang dalawa pero natalo ang 28 anyos na Pinay.
Pero sa pagkakataong ito ay inaasahang ibibigay ng tubong-Davao del Sur ang kanyang 100% na lakas lalo’t pambato ng host nation ang kanyang sasagupain.
Samantala, sasabak naman ang isa pang Pinoy boxer na si Eumir Marcial sa quarterfinals ng men’s middleweight division laban kay Arman Darchinyan ng Armenia, mamayang 11:30 ng umaga, oras sa Pilipinas. — sa panulat ni Drew Nacino.
