Nagpasalamat si Ombudsman Conchita Carpio Morales sa pamunuan ng pambansang pulisya dahil sa mabilis na pagkakadakip kay Angelito Avenido Jr, ang suspek sa pagpatay kay Assistant Special Prosecutor Madonna Joy Tanyag.
Ayon kay Morales, malaking kawalan si Tanyag sa kanilang tanggapan lalo’t kilala siyang masipag at magaling na taga-usig na humahawak ng mga tinaguriang high profile cases.
Kahapon, personal na nagtungo si Morales sa burol ni tanyag sa isang memorial chapels sa Quezon City upang magpaabot ng pakikiramay sa naulilang pamilya nito.
Una rito, iniharap din sa publiko ng Quezon City Police District si Avenido na napag-alamang nagtatago sa Maynila dahil may kinahaharap din itong kasong pananaksak at pagpatay sa General Santos City.
Magugunitang tatlong beses sinaksak ni Avenido ang limang buwang buntis na si Tanyag matapos nitong bumili ng milk tea sa bahagi ng Visayas Avenue bago umuwi mula sa kaniyang duty sa Sandiganbayan.
