Ipinasususpinde na ng senado sa Philippine Gaming Corporation (PAGCOR) ang operasyon ng online o E-Sabong habang sinisikap maresolba ang issue ng mga nawawalang sabungero.
Nagmosyon si Senate President Tito Sotto na mag-isyu ang Committee on Public Order and Dangerous Drugs ng resolusyon na nananawagang suspendihin ang license to operate ng lahat ng operator ng online sabong.
Ito’y makaraang mapakinggan ang testimonya ng pamilya ng tatlumpu’t isang nawawalang sabungero.
Inaprubahan ng komite ang mosyon ni Sotto kaya agad na ipinag-utos ni Committee Chairman at Senator Ronald “Bato” Dela Rosa ang paggawa ng resolusyon.
Samantala, inirekomenda naman ni Senator Francis Tolentino na tanggalin na rin sa G-Cash ang E-Sabong payment kung saan mabilis makataya ang kahit sino, kabilang na ang mga menor de edad. —sa ulat ni Cely Ortega-Bueno (Patrol 19)