Arestado ang isang dating opisyal ng Philippine Drug Enforcement Agency na sinasabing sangkot sa pagpatay kay Atty. Joey Luis Wee sa Cebu City noong Nobyembre ng nakaraang taon.
Ayon sa National Bureau of Investigation (NBI) Central Visayas, naaresto ang suspek na si Retired Army Col. Edwin Layese na dating Director ng PDEA region 6 noong Enero 13.
Sinabi ni NBI-7 Director Renan Oliva, may hawak silang documentary, electronic at testimonial evidence na magpapatunay na hindi lamang basta sangkot kundi tumayong supervisor ng krimen si Layese.
Ani Oliva, si Layese ang kinuhang contractor para magplano at isagawa ang pananambang kay Wee.
Magugunitang, pinaslang ang abogado sa labas lamang ng kanyang opisina sa Cebu City, isang linggo lamang matapos mapatay rin ang isa pang abogado sa Palawan.
Una nang naaresto ang isa sa suspek sa pagpatay kay Wee na si Fausto Edgar Peralta sa Laguna noong Disyembre 8.
