Laglag sa kamay ng mga tauhan ng Philippine National Police (PNP) Drug Enforcement Group (PDEG) ang mag-asawang sangkot sa iligal na droga sa Lanao Del Sur.
Kinilala ni PDEG Director P/BGen. Ronald Lee ang mga naaresto na sina Busran Saripada alyas Commander Manong at asawa nito na si Monira Alipapa Ampatua.
Ayon kay Lee, ikinasa ang drug buy bust operation sa Purok Dos, Brgy. West Kilikili sa bayan ng Wao sa nabanggit na lalawigan nitong Sabado ng hapon.
Nakuha sa mga ito ang isang kilo ng shabu na nagkakahalaga ng P6.8-milyong batay na rin sa pagtaya ng dangerous drugs board.
Agad sinampahan ng kasong paglabag sa Republic Act 9165 O Comprehensive Dangerous Drugs Act of 2002 ang dalawang suspek na nasa kostudiya ng pulisya.
