Dapat ibalik ng pamahalaan ang 60 bilyong piso na sinasabing sobrang pondo ng PhilHealth na inilipat sa National Treasury.
Ito ang sinabi ni Supreme Court Associate Justice Antonio Kho Jr. kasabay ng pahayag na ikinagulat niya na hindi sinunod ng PhilHealth ang nire-require ng batas kaugnay sa nasabing pondo.
Inatasan din ni Associate Justice Kho ang Philhealth na hilingin kay Pangulong Ferdinand Marcos Junior na ipag-utos na bawiin ang paglilipat ng sobrang pondo ng state insurer sa kaban ng bayan.
Binigyan-diin din ni Associate Justice Kho, na sa halip na ilipat sa pamahalaan ang sobrang pondo ng state insurer, dapat ay palawakin na lamang ng PhilHealth ang kanilang mga programa at benepisyo na mapapakinabangan ng taumbayan.
Gayunman, iginiit ni Deputy Treasurer Eduardo Marino III, hindi maipatutupad ng state insurer ang kanilang mga programa dahil nahaharap ito sa isyu na may kaugnayan sa structural absorptive capacity o kakulangan sa tao; kagamitan at mga ospital.—sa panulat ni Kat Gonzales
