Posibleng libreng mapanood sa Amerika ang susunod na laban ni Senador Manny Pacquiao kontra sa Australian champion na si Jeff Horn.
Inamin ito ni Top Rank President at CEO Bob Arum dahil hindi aniya sikat sa Amerika ang number 2 ranked contender sa hawak na titulo ni Pacman na WBO welterweight belt.
Sinabi ni Arum na makikipagkita siya ngayong araw na ito o bukas sa Las Vegas sa mga kinatawan ni Horn para plantsahin ang detalye ng kontrata bago siya bumiyahe naman ng Pilipinas at kausapin si Pacman hinggil sa fight contract.
Sakaling hindi maibenta sa pay per view ang Pacquiao-Horn fight sa Amerika, maaari itong ilagay sa premium cable ng libre.
Subalit pinag-aaralan ng Top Rank na sabayan ang Pacquiao-Horn showdown sa Australia ng sikat ding mga boksingero sa Amerika para maibenta pa rin sa pay per view.
By Judith Larino
