Dumipensa ang Bureau of Customs o BOC sa nangyaring pagbubukas ng diplomatic pouch ng isa nilang tauhan na para kay Japanese Emperor Akihito.
Inihayag sa DWIZ ni Customs Commissioner Bert Lina na batid naman ng kanilang mga tauhan ang nasabing package ngunit aminado naman ito na dahil sa dami kaya ito nabuksan.
Ayon sa report, may kinatawan ang Japanese Embassy sa paliparan nang mangyari ang insidente noong Nobyembre at pinagsabihan pa ang isang Customs examiner na huwag buksan ang package dahil kabilang ito sa diplomatic pouch.
Nakasaad sa Vienna Convention, hindi dapat sumailalim sa anumang pag-iinspeksyon ang lahat ng mga bagay na ipinapadala para sa mga heads of state at miyembro ng diplomatic corps.
“Yun lang ang report sa amin and we apologized sa Chinese embassy of the error na siguro maraming boxes ang nakaumang sa kanila, nabuksan, (Tinanggap naman po ng embassy yung apology niyo?), palagay ko naman.” Ani Lina
Dagdag pa ni Lina, hindi na dapat palakihin pa ang usapin dahil naisaayos na nila ang gusot mula nang mangyari ito noong isang taon.
“Palagay ko naman it’s not a big uproar, not because I’m defending the Bureau, but puwedeng mabuksan eh sa dami ng nabubuksan doon sa cargo, kasi pag-hilera doon sa table minsan nabubuksan etc. diba? But I doubt also if the Japanese representative is there, we could only surmise based on the reports.” Pahayag ni Lina.
By Jaymark Dagala | Karambola
