Itinanggi ni PAGCOR Chair Andrea Domingo na tumanggap siya ng suhol mula kay Gambling Tycoon Jack Lam.
Taliwas ito sa unang pahayag ni Justice Secretary Vitaliano Aguirre na sinabi, aniya, sa kanya mismo ni Domingo na, noong nag-aaply si Lam ng lisenya para makapagpatuloy ng operasyon, nagtangka umano siyang alukin ni Lam ng isang porsyentong bahagi mula sa mga kita niya sa Fontana Leisure Parks and Casino sa Clark, Pampanga.
Sa pagharap ni Domingo sa pagdinig ng Senate Blue Ribbon Committee sa umano’y suhulan sa ilang opisyal ng Bureau of Immigration, nilinaw niyang tatlong beses silang nagkita ni Lam sa kanyang tanggapan ngunit upang pag-usapan lamang ang isang porsyenteng buwis na binabayaran ng Fontana sa gobyerno.
Ito ang unang pagkakataong humarap sa Senado si Domingo kung saan sinabi niyang naniniwala siyang nalulugi nang mahigit sa 13 Bilyong Piso ang gobyerno sa kontrata nito sa Fontana.
By: Avee Devierte
