Hindi na bago ang pagdami ng fake accounts sa Facebook na tulad ng nangyayari sa kasalukuyan.
Ayon kay Police Captain Jeck Robin Gammad, spokesperson ng Philippine National Police-Anti-Cybercrime Group (PNP-ACG), mula pa nuong Enero ay nasa 188 nang reklamo ng identity theft ang kanilang natanggap.
Kahit nga anya si Police Lt. Gen. Guillermo Eleazar ay lumalabas na may walong Facebook accounts kung saan anim na anya ang napatanggal na nila sa Facebook Philippines.
Sinabi ni Gammad na posibleng nagkataon lamang na sa panahong ito ay biglang dumami ang gumagaya ng accounts.
Matatandaan na biglang dumami ang bilang fake accounts sa Facebook kasabay ng mga protesta laban sa Anti-Terrorism Bill.
