Hihimayin sa muling pagdinig ng Kamara ang mga isyu na bumabalot sa panukalang 25-year franchise ng ABS-CBN.
Ito ang inasahan ni Laguna Representative Sol Aragones, isa sa author ng mga panukalang humihiling ng panibagong 25 taong prangkisa ng network.
Ayon kay Aragones, mahalagang mapakinggan ang panig ng kapwa pabor at tutol sa pagbibigay ng prangkisa ABS-CBN.
Gayundin, masasagot din aniya ang mga katanungan hinggil sa network at inaasahang mareresolba na rin ang mga usapin na kinakailangang maayos.
Sinabi ni Aragones, mahalaga rin ang pag-asang maibibigay ng muling pagbabalik ng pagdinig ng House Committee on Legislative Franchise sa mga empleyado ng network na nangangambang tuluyang mawalan ng trabaho.
