Tinawag na fake news ng National Capital Region Police Office (NCRPO) ang kumakalat na post ng San Jose City Police Office ng Nueva Ecija sa social media.
Ito’y kaugnay sa umano’y paghahain ng leave of absense ni Makati City Police Chief Col. Harold Depositar dahil sa umano’y maling paghawak nito sa kaso ng pagkamatay ng 23 anyos na flight attendant na si Christine Dacera.
Ayon kay NCRPO Director P/Bgen. Vicente Danao Jr., wala siyang natatanggap na anumang liham mula kay depositar hinggil sa pagnanais nitong lumiban sa trabaho.
Nakasaad sa post ng San Jose City Police sa Facebook ang umano’y confession ni depositar gayundin ang paghingi niya ng paumanhin kina Pangulong Rodrigo Duterte, PNP Chief P/Gen. Debold Sinas at sa kaniyang regional director na si Danao.
Sinasabi rin umano ruon ni Depositar na handa niyang harapin ang anumang parusang ipapataw sa kaniya dahil sa kaniyang mga nagawa.
Pero ayon kay Danao, mananatili sa puwesto si Depositar kahit kasalukuyang gumugulong ang imbestigasyon sa insidente matapos ibasura ng Makati City Prosecutor’s Office ang naunang kasong rape with homicide na isinampa nila laban sa mga itinuturong suspek.
