Pinapurihan ng NCRPO o National Capital Region Police Office ang mahigpit at epektibong pagpapatupad ng seguridad sa MRT o Metro Rail Transit Line 3.
TINGNAN:
Lalaking nagtangkang magpasok ng granada sa MRT, iniharap sa media pic.twitter.com/IybG0Moetn— DWIZ Newscenter (@dwiz882) February 24, 2019
Ito’y makaraang maharang ng mga security personnel nito ang tangkang pagpasok ng granada ng isang lalaki sa Cubao station nito kagabi.
Ginawa ni NCRPO Chief P/Dir. Guillermo Eleazar ang pahayag sa ipinatawag nitong pulong balitaan sa punong tanggapan ng QCPD o Quezon City Police District sa Kampo Karingal kaninang umaga.
Magugunitang naaresto ang naturang lalaki dakong alas siete dies kagabi matapos mamataan ng security personnel ng MRT sa x-ray machine ang granada na nakasilid sa kaniyang bag.
Ito ang nagtulak sa mga guwardya ng MRT na i-ulat sa mga pulis ang nakitang granada na dahilan para agad itong arestuhin at isailalim sa imbestigasyon.
Sinasabing pagmamay-ari ng kapatid ng naaresto na isa umanong sundalo ang nakuhang granada sa kaniya.
Dahil dito, inaalam na ng NCRPO kung paano napunta sa naturang lalaki ang nasabing granada gayundin ay kung may pananagutan dito ang kaniyang kapatid.
