Tiniyak ng Philippine National Police (PNP) na kanila nang iniimbestigahan ang pagkakasama nina Olympics weightlifter Hidilyn Diaz at reporter na si Gretchen Ho sa umano’y Oust Duterte Matrix ng Malakanyang.
Ayon kay PNP Spokesman Police Colonel Bernard Banac, tumutulong na sila sa tanggapan ng pangulo para magsagawa ng validation sa mga pangalang napabilang sa naturang matrix.
Gayunman, aminado si Banac na mahirap at kakain ng oras ang proseso ng pangangalap ng mga ebidensiya at impormasyon hinggil dito para makapagkasa ng kaso.
Magugunitang nitong Miyerkules, inilabas ni Presidential Spokesperson Salvador Panelo ang umano’y bagong ouster plot matrix na nag-ugat sa kontrobersiyal na viral video ni alyas Bikoy na “Ang Totoong Narcolist”.
