Posibleng may foul play sa pagkamatay ng isang Pinay Overseas Filipino Worker o OFW na nahulog umano sa ika-anim na palapag ng gusali sa Lebanon.
Ito ang hinala ni Marilyn orpia, kapatid ng nasawing OFW na si Alma Cristobal, residente ng San Andres, San Mateo sa Isabela.
Sinabi ni Orpia na naikuwento sa kaniya ng kapatid na Pebrero pa lamang ay hindi siya pinapakain ng tama ng kaniyang amo at natutulog na lamang ng gutom bukod pa sa palagi siyang tinatakot.
Nagkaroon na aniya ng sakit ang kaniyang kapatid na huli nilang nakausap nitong nakalipas na araw ng Linggo.
Ayon pa kay Orpia, may nakakita sa kapatid niyang nasa likod ng kaniyang amo habang nagsasampay ng kaniyang mga nilabhan kaya’t malakas ang paniniwala nilang itinulak ito ng kaniyang amo.
—-
