Itinuturing ng case closed ng Rizal Provincial Police Office ang kaso ng pagpatay sa magkasintahang estudyante ng Colegio de Montalban sa bayan ng Rodriguez.
Ito’y makaraang masakote ng pulisya ang tatlong suspek na itinuro ng nakonsensiya nilang kasabwat sa pagpaslang kina John Vincent Umiten at Charmaine Villarias na ginahasa pa umano ng mga suspek.
Kinilala ang mga suspek na sina Mark Anthony Leonador alyas Tonton; Jesus Ubani Junior alyas Jojo at Michael Sales.
Unang naaresto si Leonador noong Oktubre 6 dahil sa kasong iligal na droga at aminadong kasama siya nina Ubani at Sales sa pagpaplanong nakawan ang dalawang biktima.
Oktubre 5 nang matagpuang patay ang magkasintahan sa liblib na bahagi ng barangay San Jose.
