Pabor si Manila Mayor Francisco “Isko Moreno” Domagoso sakaling gawing karagdagang vaccination site ang Dolomite Beach sa Roxas Boulevard.
Ito ang tugon ni Domagoso sa tanong kung posibleng maging vaccination site ang artificial beach kasabay ng pagbubukas ng Manila Zoo kahapon kung saan maaari ring makapagpabakuna ang mga menor de edad na 12 hanggang 17 anyos.
Ayon kay Yorme, kung lalabas sa pag-aaral na maaaring gawin at ligtas ang mga indibidwal, kabilang na ang mga menor de edad at nakatatanda na magpabakuna sa naturang lugar, hindi siya magdadalawang-isip na idagdag ito sa isa sa kanilang vaccination sites.
Inihayag din ni Moreno na bukas naman siya sa mga ideya lalo’t kung isa ito sa mga solusyon upang mapabilis ang pag-aksyon sa mga problemang kinakaharap ng mga mamamayan.
