Kinondena ng Makabayan bloc ang pahayag ni Pangulong Rodrigo Duterte na papel lang umano ang pagkapanalo ng Pilipinas laban sa China sa international arbitral tribunal noong 2016.
Ayon kay ACT Teachers party-list Representative France Castro, napaka-insensitive at napakabalahura ang naturang pahayag ng pangulo.
Giit ni Castro, takot na takot ang pangulo sa galit ng China pero hindi sa galit ng mamamayang Pilipino.
Naniniwala rin aniya siya na walang halaga sa pangulo ang kabuhayan ng mga Pilipinong mangingisda na umaasa sa pinagkukunan ng mga ito ng isda sa West Philippine Sea.
Samantala, sinabi ni Bayan Muna party-list Rep. Carlos Isagani Zarate na napakalaki ng implikasyon ng mga binitawang salita ng pangulo kaugnay sa isyu ng pinag-aagawang teritoryo.
Aniya, tila sa mga sinabi niyang ito ay isinusuko na niya ang karapatan ng Pilipinas sa naturang teritoryo.
