Umaapela ng tulong sa mga otoridad maging sa publiko ang pamilya ng UP – Los Baños, Laguna graduate na si Michael Kenneth Cruz na nawawala simula pa noong isang linggo.
Huling nakita at nakasama si Cruz ng kanyang pamilya at girlfriend noong Huwebes ng madaling araw, March 16 o bago umalis patungo sa kanyang trabaho.
Ayon kay Dolores, wala siyang maisip na rason ng biglaang pagkawala ng kanyang bunsong anak na isang licensed chemical engineer at nagtapos bilang Magna Cum Laude noong 2015.
Inihayag naman ni Andrea Baule, kasintahan ng 23 anyos na engineer, na unang araw sana sa trabaho ni Michael noong Huwebes sa isang food and beverage company sa Balayan, Batangas.
Nagpadala pa anya ng text message dakong 3:00 at 4:00 ng madaling araw ang boyfriend na nagsabing nasa Taft Avenue, Pasay City na ito upang sumakay ng bus papasok sa trabaho.
Samantala, lalong nag-alala ang pamilya at girlfriend ni Michael nang matanggap ang tawag mula sa kumpanya sanang pagta-trabauhan nito at kinumpirmang hindi pumasok ang binata.
Pasay City Police naka-alerto na sa paghahanap sa nawawalang UPLB Graduate
Tinututukan na ng Pasay City Police ang paghahanap sa UP – Los Baños, Laguna graduate na si Michael Kenneth Cruz.
Ayon kay SPO1 Loren Osias ng Pasay City Police Investigation Division, sa ngayon ay wala silang updates o sightings na naitala pero naka-alerto sila sa kaso.
Sa ngayon anya ay isa ng missing person ang 23 anyos na licensed engineer at ipinadala na ang case report sa Southern Police District.
Nagpasaklolo na rin ang pamilya Cruz sa Barangays 97 at 98 sa Pasay upang masilip ang mga CCTV footage para sa posibleng sightings ng binata pero malabo ang kuha kaya’t hindi makumpirma kung nakunan si Michael na noo’y naka-suot ng gray jacket at may bitbit na black bag.
Maaari namang makipag-tulungan ang sinumang nakakita o naka-aalam sa kinaroroonan ni michael sa pamamagitan ng pagtawag o pagtext sa numero ng kanyang ina na si Dolores Cruz na 0919-248-1855 o sa Pasay City Police.
By Drew Nacino
Photo Credit: Michael Kenneth Cruz Facebook Account
