PInagkibit-balikat lamang ng Pangulong Rodrigo Duterte ang mga resulta ng survey na inilabas ng Social Weather Station o SWS at Pulse Asia kamakailan lamang.
Ayon sa Pangulo, wala siyang pakialam sa mga lumalabas na mga survey dahil mas mahalaga aniya na gawin niya ang kanyang trabaho at tuparin ang kanyang mga pangako sa taumbayan noong eleksyon.
Kasama na aniya dito ang paglaban sa iligal na droga at korapsyon.
Aniya, hindi importante kung hindi siya kilala o ‘unpopular’ siya sa taumbayan dahil sa ipinapatupad na programa ng administrasyon katulad ng ‘war on drugs’, na inuulan ng batikos dahil sa umano’y namamatay na mga inosente.
Binigyang-diin din ng Pangulo na handa siyang makulong at mamatay para maisakatuparan lamang ang kanyang pangako sa Pilipinas.
