Buong-buo ang tiwala ng Pangulong Rodrigo Duterte kay Justice Secretary Vitaliano Aguirre.
Tiniyak ito ni Presidential Spokesman Ernesto Abella sa harap ng mga batikos na inabot ni Aguirre matapos nyang pilit na iugnay ang oposisyon sa krisis sa Marawi City.
Ayon kay Abella, para sa Palasyo, mananatiling mga ispekulasyon ang mga sinabi ni Aguirre laban sa mga miyembro ng oposisyon na di umano’y nagtungo sa Marawi at nakipag pulong sa isang pamilya na posibleng may kinalaman sa Marawi Crisis.
Matatandaan na sinabi ni Aguirre na noong Mayo 2 ay nakipag-pulong sina Senador Antonio Trillanes, Senador Bam Aquino , Congressman Gary Alejano at Ronald Llamas sa maimpluwensyang pamilya ng mga Alonto at Lucman sa Marawi City.
Sinabi ni Aguirre na posibleng nag-ugat ang terorismo sa Marawi City sa naturang pulong na ang pangunahing layunin ay guluhin ang Duterte administration.
Gayunman, lumabas na ang ebidensyang larawan na ipinakikita ni Aguirre ay kuha pa noong 2015.
By Len Aguirre
