Inihahanda na ni Pangulong Rodrigo Duterte ang ilalabas nitong Executive Order na magdedeklara sa CPP-NPA at NDF bilang teroristang grupo.
Inihayag iyan ng Pangulo makaraang tuluyan na nitong tuldukan ang usapang pangkapayapaan sa pagitan ng pamahalaan at ng komunistang grupo.
Sa kaniyang talumpati sa send-off ceremonies sa mga naarestong Vietnamese Fishermen sa Sual, Pangasinan, ini-utos ng Pangulo sa mga sundalo na barilin agad ang mga NPA na kanilang makakaharap sa mga operasyon.
Sinabi pa ng Pangulo na mainam na ang mga rebelde na ang mapatay sa halip na ang mga sundalo at tiniyak nitong pananagutan niya sa taumbayan ang mga sundalong makapapatay sa mga rebelde.
Kasunod nito, ibinabala ng Pangulo na posibleng samantalahin ng mga terorista partikular na ng ISIS ang sitwasyon para maisakatuparan ang kanilang misyong makapagtayo ng teritoryo sa Asya.
