Nagpaabot ng pagbati si Pangulong Rodrigo Duterte sa buong bansa at maging sa Chinese community kasabay ng pagdiriwang ng Chinese New Year ngayong araw.
Sa mensahe ng Pangulo, sinabi nito na hangad niya ang magandang kapalaran at panibagong lakas upang makaahon mula sa dagok ng pandemya at iba pang hamon sa buhay.
Aniya, mas naging matatag ang bansa dahil na rin sa tapang, determinasyon at pananalig sa Maykapal.
Hiling ng Pangulo sa mga mamamayang Pilipino na ipagpatuloy lamang ang bayanihan at pagmamalasakit sa isa’t isa, lalo na sa mga higit na nangangailangan.
Umapela rin ang Pangulo na ipagtuloy ang paghahanap ng oportunidad para sa kaunlaran at magsilbing instrumento ng pagbibigayan at kapayapaan.
Panalangin ni Pangulong Duterte ngayong Year of the Water Tiger, na magdulot ito ng maayos na kalusugan, kasaganahan at kaunlaran para sa lahat.—mula sa ulat ni Jopel Pelenio (Patrol 17)
