Inamin ni Pangulong Ferdinand Marcos Jr. na may maganda siyang inaasahan para sa ekonomiya ng bansa.
Ito’y makaraang bumaba ang unemployment rate noong Oktubre.
Ang pahayag ay ginawa ni Pangulong Marcos sa isang video message kung saan tiniyak niya sa mga Filipino na pagagaanin ang kanilang pasanin, sa gitna ng mga kasalukuyang pagsubok, lalo na ang tumataas na presyo ng mga bilihin.
“Ang balita na tumaas ang inflation rate na hanggang eight percent last November. Mayroon naman kasabay na mas magandang balita na bumaba ang unemployment rate sa four and a half percent mula sa five percent,” sabi ng Pangulo.
“Kaya’t kahit papaano ay malakas ang loob natin na hindi tayo magkakaroon ng recession dito sa Pilipinas dahil masyadong mababa ang unemployment rate at kung maaalala ninyo sa pagsimula namin dito sa administrasyong ito ay pinag-usapan na namin ay trabaho talaga ang aming uunahin. Kaya’t ‘yan ang nakikita ngayon natin na nangyayari. Ipagpatuloy lang natin ‘yan,” pagbibigay diin pa niya.
Bukod dito, tiniyak ng Punong Ehekutibo na humahanap ng mga paraan ang kanyang administrasyon upang mapagaan ang epekto ng mataas na presyo ng mga pangunahing bilihin sa mga ordinaryong Filipino.
“At asahan ninyo na lahat ng paraaan na maari nating gawin ay gagawin natin para pababain ang inflation rate at gawing mas mabagal man lang ang pagtaas ng presyo,” pagtitiyak ni Pangulong Marcos.
Sa preliminary results ng latest labor force survey ng Philippine Statistics Authority (PSA), bumagsak sa 4.5% ang unemployment rate noong Oktubre kumpara sa 7.4% noong October 2021 at 5 percent noong Setyembre.
Lumabas sa PSA survey na nabawasan ng 2.24 million ang bilang ng unemployed Filipinos noong Oktubre mula sa 3.5 million noong nakaraang taon.
Ayon pa rin sa survey, lumobo sa 95.5% ang employment rate noong Oktubre mula sa 95% noong Setyembre, na pinakamataas na naitala simula noong January 2020.
