Suportado ni Senador Panfilo Lacson ang PDEA o Philippine Drug Enforcement Agency bilang forefront o nangunguna sa kampanya kontra iligal na droga.
Sa katunayan, ipinabatid sa DWIZ ni Lacson na noong isang taon pa lamang ay naisulong niyang madagdagan ng mahigit 680 million pesos ang 2016 budget ng PDEA batay na rin sa kahilingan ng mga opisyal nito.
Ayon pa kay Lacson, namomonitor ng PDEA ang lahat ng activities ng mga pulis sa usapin ng kampanya kontra illegal drugs maliban na lamang sa pagdukot at pagpatay kay Korean executive Jee Ick Joo.
“Sila ang nasa forefront pero actually yung gagawin ng pulis ngayon magtatalaga sila ng mga pulis ngayon on secondment, hindi na yung independently, diba dati yung pulis ang nangunguna sila yung nasa ground pero dahil binuwag na yung AIDG nila all the way down, eh wala na yung mga unit, magtatalaga na lang ng mga personnel ang PNP, dapat nga composite ito pati NBI, ang sina-suggest namin ay baka puwedeng may naka-detail na ring prosecutors para pag may evidence, ma-guide sila.” Ani Lacson.
Philippine Constabulary
Samantala, tutol si Senador Panfilo Lacson sa plano ng Pangulong Rodrigo Duterte na buhayin ang PC o Philippine Constabulary.
Sinabi sa DWIZ ni Lacson, dating PNP Chief na magsasayang lamang ng budget kung bubuhayin ang PC na national in scope rin tulad ng PNP o philippine National Police.
Ayon pa kay Lacson, hindi rin uubra ang aniya’y posibleng iniisip ng Pangulong Duterte na tila national guard na kakailanganin lamang kung mayroong malaking kaguluhan.
“National in scope din yan eh, unless kung ang ine-envision ni Pangulong Duterte ay parang national guard, pero mahirap ma-afford yun dahil papasok ang national guard kung may kalamidad o malalaking kaguluhan, tutal national in scope naman ang PNP bakit gagawa pa tayo ng another layer na mag-oorganize pa tayo, malaking drain sa budget yun.” Dagdag ni Lacson.
By Judith Larino | Karambola (Interview)
