Nakapagtala ang Philippine Chamber of Commerce and Industry (PCCI) ng 56 na insidente ng kidnapping sa Pilipinas sa nakalipas na 10 araw.
Taliwas ito sa inihayag ni PNP deputy chief for Administration Jose Chiquito Malayo na apat lamang ang naitalang kidnapping incidents sa bansa simula Enero.
Sa Joint Press Conference sa Kamara nina House Minority Leader Marcelino Libanan at Malayo, sinabi ni PCCI president Lugene na kabilang sa limampu’t anim na kaso ang pagdukot sa ilang kabataan.
Madalas aniya itong maganap sa Binondo, Maynila; Pasay; Parañaque at Makati.
Tiniyak naman ni Malayo na bukas ang kanilang tanggapan sa anumang sumbong upang masuri ito at maprotektahan ang Chinese Community sa Binondo.
Una nang inihayag ni PNP spokesperson, Col. Jean Fajardo na batay sa kanilang datos hanggang noong Hulyo ay umabot na sa 25 insidente ng kidnapping ang naitala sa bansa at karaniwang may kaugnayan sa (POGO) Philippine Offshore Gaming Operators.