Personal nagpaabot ng pakikiramay sina Special Assistant to the President Antonio Lagdameo Jr. at Defense Secretary Gilbert Teodoro sa mga naulilang pamilya ng dalawang piloto na nasawi sa trahedyang pagbagsak ng fighter jet.
Bilang pagkilala sa serbisyo, ang dalawang piloto ng Philippine Air Force (PAF) na nasawi sa isang misyon sa Bukidnon ay ginawaran ng Distinguished Aviation Cross, ang pinakamataas na parangal para sa mga aviator sa Armed Forces of the Philippines (AFP).
Ang mga labi nina Major Jude Salang-Oy at 1st Lieutenant April John Dadulla ay ibinalik sa Villamor Air Base sa Pasay City sakay ng isang C-130 na eroplano.
Sinalubong sila ng mga parangal mula sa AFP at mga opisyal ng gobyerno noong Sabado, Marso 8.
Kinatawan ni Special Assistant to the President Antonio Lagdameo Jr. si Pangulong Ferdinand Marcos Jr. sa seremonya.
Nagpaabot naman ng pakikiramay ang kalihim at nag-alok ito ng tulong mula sa gobyerno para sa mga pamilya ng mga pumanaw na piloto.
Sa isang panayam, ipinahayag ni Lagdameo ang pagdadalamhati ng buong gobyerno sa pagkawala ng dalawang “bayani” na nagbuwis ng kanilang buhay sa paglilingkod para sa mga mamamayang Pilipino.
Pahayag ni PAF 403rd Infantry Brigade commander Colonel Antonio Duluan Jr., ang dalawang piloto ay nakatakdang magbigay ng air support sa mga ground troops laban sa mga rebelde ng New People’s Army na nasa kabundukan ng Bukidnon noong Marso 4 bago ang insidente.
“In this time of sorrow, our thoughts are with all those affected by this tragic loss,” sabi ni Lagdameo. “As we grieve together, we remain steadfast in our commitment to providing the necessary support and resources to help individuals and families through this difficult time.”
Nabatid na magdaraos din ng vigil sa Villamor Air Base at Basa Air Base sa Pampanga, upang magbigay-galang ang mga kasamahan sa PAF at mga opisyal sa mga yumaong piloto.
Nakita ang mga labi nina Major Salang-Oy at Lieutenant Dadulla noong Marso 5 sa loob ng kanilang FA-50 plane na bumagsak sa kalagitnaan ng Kalatungan mountain range sa Bukidnon.
Habang nagsasagawa ng isang routine operation noong gabi ng Marso 4, nawalan ng komunikasyon ang FA-50 fighter jet, na papunta sana sa Mactan Airbase sa Cebu, sa isang kasamahan nitong eroplano bago ito mawala mula sa radar.
Samantala, dumalo rin sa seremonya ang iba’t ibang mga opisyal ng militar at gobyerno, kabilang sina Defense Secretary Gilbert Teodoro at AFP Chief General Romeo Brawner, Jr.
