Tali ang kamay ng PNP Cebu sa nangyaring pamamaril ng isang Chinese national sa 3 Chinese diplomats na kinabibilangan ng Consul General ng China.
Sugatan sa insidente si Chinese Consul General Song Ronghua samantalang patay sa insidente sina Deputy Consul General Sun Shan at Consul at Finance Officer Hui Li.
Ayon kay Senior Supt. Rey Lyndon Lawas, Spokesman ng Cebu City Police, bagamat nasa custody nila ang suspect, hindi nila ito ma-imbistigahan dahil meron itong diplomatic immunity.
Ang suspect aniya na si Li Quing Liang ay asawa ni Guo Jing na isang Chinese diplomat.
Ipinagdiriwang ni Consul General Song Ronghua ang kanyang kaarawan sa Lighthouse Restaurant sa Cebu City kasama ang 8 iba pa na kinabibilangan ng mag-asawang suspect.
Sinabi ni Lawas na batay sa testimonya ng mga testigo, wala naman silang napansing pagtatalo sa mesa ng mga Chinese diplomats.
“On going pa po yung investigation natin yung Department of Foreign Affairs po natin tsaka yung Chinese Embassy they are having an internal process dahil mga ano po ito, yung status po nila are diplomats, yung opisina po natin ng DFA at Chinese Embassy, sila po ang nag-uusap.” Pahayag ni Lawas.
By Len Aguirre | Ratsada Balita
