Hinahanap na ng PNP o Philippine National Police ang apat na persons of interest kasunod ng nangyaring pagpapasabog sa isang night market sa Davao city.
Ayon kay PNP region 11 director Chief Supt. Manuel Gaerlan, isa sa mga tinitingnang motibo ng pambansang pulisya ang umano’y alitan ng mga vendor sa naganap na pagpapasabog kagabi. Sinabi ni Gaerlan na noong mga nakalipas na araw ay may naiulat umanong alitan sa mga tindera sa nasabing lugar kaya posibleng isa ito sa anggulo ng pagpapasabog.
Iginiit ng opisyal lahat ng anggulo ay kailangan nilang sipatin para matukoy ang tunay na motibo sa insidente lalo’t wala pa silang matukoy na suspek sa ngayon.
Sinabi ni Gaerlan bagamat may umaako na umano sa insidente, ayaw nilang mag-conclude kaaagad.
Sakali naman aniyang ang Abu Sayaff group talaga ang may kagagawan ng insidenteng ito ay nakahanda ang PNP sa mga posibleng gagawin pang pag atake ng mga bandido.
By Meann Tanbio
Photo Credit: AP Photo/Manman Dejeto
