Hinamon ng PNP o Philippine National Police si Ozamiz City Vice Mayor Nova Princess Parojinog na patuyan ang paratang na planted o itinanim ang mga nakuhang ebidensya sa kanilang tahanan.
Ayon kay PNP Spokesman Chief Superintendent Dionardo Carlos, dokumentado ang operasyon ng CIDG o Criminal Investigation and Detection Group sa tahanan ng mga Parojinog noong Linggo.
Aniya, anumang pagkuwestiyon ukol sa nasabing operasyon ay dapat dalhin na lamang sa Korte.
Giit pa ni Carlos, may video na nagpapakitang may hawak na droga si Vice Mayor Parojinog na tinangka pa niyang itago.
