Aminado ang Philippine Overseas Employment Administration (POEA) na isang malaking pagsubok parin ang paglikas ng mga seafarer mula sa bansang sinasakop ng Russia.
Ayon kay POEA Administrator Bernard Olalia, hirap parin sila sa paglikas sa mga Pinoy seafarer sa gitna ng girian sa pagitan ng Russia at Ukraine.
Sinabi ni Olalia na bukod sa isandaang tripulanteng Pinoy na dumating sa Pilipinas, darating pa ang nasa 140.
Bukod pa dito, inaayos pa ang repatriation ng nasa mahigit 200 Pinoy crew members na nasa kanilang mga barko sa Ukraine.
Nito lamang sabado, nasa 25 tripulante ang naiuwi ng POEA sa Pilipinas kung saan, umabot na sa 323 sa 470 na mga Pinoy mula Ukraine ang natulungan na ng gobyerno.
Sinabi pa ni Olalia na magkakaloob ang pamahalaan ng $200 financial aid para sa mga Overseas Filipino Workers (OFWs) na naiuwi sa Pilipinas mula sa Ukraine.
Nakahanda rin umano ang POEA na tulungan ang mga umuwing OFWs para makahanap ng ibang trabaho.
Dahil sa patuloy na kaguluhan sa Russia at Ukraine, nagpatupad na ang pamahalaan ng Pilipinas ng deployment ban ng mga OFW sa dalawang nabanggit na bansa. —sa panulat ni Angelica Doctolero
