Tinatalakay na ng pamahalaan kung paano mare-regulate ang pagpo-post ng mga impormasyon sa social media.
Sa gitna ito ng naglipanang fake news matapos arestuhin ng International Criminal Court sa pamamagitan ng interpol si dating Pangulong Rodrigo Duterte.
Ayon kay sinabi ni Palace Press Officer at Presidential Communications Office Undersecretary Claire Castro, hindi lamang ang gobyerno kundi pati ang taumbayan ang kailangang magtulong-tulong para maiwasan at tuluyang matuldukan ang pagkalat ng mga hindi totoong impormasyon gamit ang internet o social media.
Ito rin aniya ang dahilan kung bakit humihingi sila ng tulong ng mainstream media para mailabas sa publiko ang mga totoong impormasyon na talagang sumailalim sa masusing verification.
Sinabi ni Usec. Castro na pati ang Korte Suprema ay nagrereklamo na sa fake news, dahil kumalat din kamakailan sa social media ang isang pekeng dokumento na nagpapakita ng isang petisyon na nagpapabitiw sa puwesto kay Pangulong Ferdinand Marcos Jr.
Binigyan-diin ng Palace official na “whole-of-nation approach” ang kailangan para tuluyan nang matigil ang pagkalat ng fake news online.—sa panulat ni John Riz Calata
