Patay ang isang pulis matapos pagbabarilin sa harap ng kanyang bahay sa Barangay Dela Paz, Antipolo City sa lalawigan ng Rizal.
Kinilala ang pinaslang na pulis na si PO3 Don Carlo Mangui na nakatalaga sa PNP Crime Lab sa Kampo Krame.
Ayon sa Rizal PNP, pasado 1:00 ng madaling araw habang nakikipag-inuman si Mangui sa kanyang mga kaibigan sa labas ng bahay nito nang biglang may sumulpot na mga lalaki sa kanyang likuran at binaril ito sa ulo na agad na ikinamatay ng biktima.
Habang papatakas naman ang mga suspek, may isa pang biktima ang pinagbabaril ng mga ito pero nakaligtas.
Patuloy namang iniimbestigahan ng pulisya ang motibo sa pagpaslang sa nasabing pulis.
(With report from Jonathan Andal)
