Nanindigan si House Quad Committee Over-All lead Chairman Rep. Robert Ace Barbers, na hindi magbibigay ng anumang dokumento o ebidensya ang komite sa international criminal court kaugnay sa mga naging imbestigasyon nito sa war on drugs campaign ng nakaraang administrasyon.
Kasunod ito ng paglilitis ng ICC kay dating Pangulong Rodrigo Duterte dahil sa crimes against humanity makaraang ipatupad ang madugong kampanya kontra droga, kung saan, sinasabing libu-libong biktima ang namatay.
Binigyang-diin ni Cong. Barbers, na bukod sa hindi obligado ang komite na isumite ang mga dokumento at salaysay mula sa mga testigo dahil hindi na miyembro ng ICC ang Pilipinas, hindi rin maaaring maglabas ng subpoena sa komite para sa naturang mga dokumento.
Samantala, sinabi pa ng Surigao solon na walang kaugnayan ang umiiral na contempt order ng komite laban kay Atty. Harry Roque, sa pagiging legal counsel nito kay dating Pangulong Duterte.
Mayroon lamang aniyang bisa sa Pilipinas ang contempt order at hindi maaaring ipatupad ng Interpol. —sa panulat ni Laica Cuevas mula kay Geli Mendez (Patrol 30)
