Iniimbestigahan na ng mga tauhan ng Scene of the Crime Operatives (SOCO) at ng Marikina Police ang nangyaring pananambang sa isang retiradong Pulis sa Marikina City.
Kinilala ni P/Maj. Neil de Castro, hepe ng Criminal Investigation and Detection Unit ng Marikina, ang biktima na si Nomer Cardines.
Nangyari ang insidente sa bahagi ng Riverbanks sa Sitio Olandes dakong alas-9 kaninang umaga kung saan, walang habas na pinagbabaril si Cardines ng dalawang armadong lalaki na sakay ng motorsiklo.
Nabatid na matagal nang retirado sa pagkapulis ang biktima na ngayon ay isa nang negosyante sa lugar.
Aabot naman sa 18 basyo ng bala ang nakuha ng mga opetiba ng SOCO sa pinangyarihan ng krimen.
Blangko pa ang mga Pulis sa pagkakakilanlan ng mga salarin gayundin sa motibo ng mga ito sa krimen.
