Nanawagan si Vice President Leni Robredo sa publiko na magpabakuna na kontra COVID-19 at patuloy na sumunod sa umiiral na health protocols.
Ito’y ang panawagan ni Robredo sa gitna ng paggunita ng bansa sa araw ng mga bayani.
Giit ng opisyal, ang dalawang bagay na ito ay malaking tulong sa laban ng ating bansa laban sa mapanghamong panahon bunsod ng COVID-19 pandemic.
Paliwanag ni Robredo, hindi kailangan ang magarbong pagkilos sa panahong ito dahil gaano man aniya kaliit ang gawain ay maituturing na kabayanihan basta’t nakasentro ito sa kapwa.
Sa huli, nagbigay pugay ang Bise Presidente sa lahat ng mga pilipinong nagbuwis ng buhay para sa kapakanan ng mas nakararami at ng bayan.
