Aabot sa 6,300 sako ng smuggled na sibuyas ang nasabat ng Bureau of Customs (BOC) sa Davao City.
Ayon kay Customs Commissioner Isidro Lapeña, apat na container vans na naglalaman ng smuggled goods mula China ang kanilang binuksan.
Nakita sa loob ng container vans ang karton-karton ng mansanas subalit nang kanilang buksan ay tumambad ang mga sako-sakong sibuyas.
Dalawa pang container na mula naman sa Indonesia at US ang kanilang binuksan na naglalaman ng 400 karton ng candy at 869 na karton ng katol.
Nadiskubreng gawa sa Pasig City ang mga Snowbear Candy pero nagmula ang container sa China na maaaring peke.
Nag-issue na ang BOC ng warrants of seizure and detention alinsunod sa Section 1400 at Section 1300 ng Customs Modernization and Tariff Act sa mga responsable sa pagpuslit ng mga naturang produkto.
—-
