Tukoy na ng inter-agency anti-arson task force ang sanhi ng sunog sa NCCC mall sa Davao City na ikinasawi ng tatlumpu’t walo katao noong Disyembre 23.
Ayon kay Fire Supt. Jerry Candido, spokesman ng task force, batay sa kanilang mga nakalap na ebidensya ay electrical short circuit ang sanhi ng pagkalat ng apoy.
Nagkakaroon anya ng “spark” kapag kina-kalawang ang wiring na nagdudulot naman ng electrical fire.
Natagpuan ang faulty electrical wiring sa kisame sa pagitan ng furniture at fabric sections na kapwa mayroong mga highly combustible material.
Samantala, pinaghahanap pa sa mall ang isang Alexandra Moreno, call center agent na nawawala simula pa noong Disyembre 23.
